ஆத்மாவும் அதுபடும் பாடும் 1
ஆத்மாவும் அதுபடும் பாடும் 2
தூங்குபவனும் இறந்தவனும் ஒரே இயற்பியல் நிலையில் இல்லை என்பதை நாம் அனைவரும் அறிவோம். அப்படியானால் அலிசன் அவர்களுடைய ஆய்வின் நோக்கம்தான் என்ன? தீர்ப்பை எழுதிவிட்டு விசாரனை நாடகம் நடத்தும் நேர்மையை அலி அசனின் ஆய்வு வெளிப்படுத்துகிறது. இந்த ஆய்வை எடுத்தெழுதியுள்ள திரு. அப்துல் வஹ்ஹாப் அவர்கள் இசுலாம்தான் இந்த அரிய உண்மையைக்(?) கூறுவதாகவும் அகமகிழ்ந்து போகிறார்.
இதுபற்றி பிரகதாரண்ய உபநிடதத்தில் கூறப்பட்டுள்ளதாவது;
அவன் ஆழ்ந்த உறக்கத்தில் இருக்கும்போது அவன் எதையுமே உணர்வதில்லை. இதயத்திலிருந்து புரீதத் சக்கரத்திற்கு ஹிதா என்னும் எழுபத்தி இரண்டாயிரம் நாடிகள் போகின்றன. அவற்றின் வழியே ஜீவன் புரீதத் சக்கரத்திற்குச் சென்று அங்கே உறங்குகிறது. சிறு குழந்தையும், பேரரசனும், சிறந்த பிராமணனும் ஆனந்தத்தின் எல்லையை அடைந்து ஆழ்ந்த உறக்கத்தில் மூழ்கிவிடுவதுபோல, ஜீவனும் புரிதத் சக்கரத்தில் தூங்குகிறான்.
சாந்தோக்கிய உபநிடதம் பின்வருமாறு கூறுகிறது;
எங்கு ஜீவன் மிக மகிழ்து கனவு காணாமல் இருக்குமோ அப்போது அது ஹிதா என்னும் நாடிகளில் உறங்கும் –என்று கூறுகிறது.
இதற்கு முரண்பாடாகவும் சாந்தோக்கிய உபநிடதம் ~அன்பிற்குரியவனே! ஜீவன் உறங்கும்போது அது பிரம்மத்துடன் கலந்திருக்கும். அது தன்னை பிரம்மத்துடன் இணைத்துக்கொண்டிருக்கும்~ என்று உத்தாலக் ஆருணி தனது மகனான ஸ்வேதகேதுவுக்கு கூறுவதாக கூறுகிறது.
இவ்வாறு நாள்தோறும் பிரம்மத்துடன் கலந்துகொண்டே இருக்கிறோம் என்று கூறும் சாந்தோக்கிய உபநிடதம் மேலும் கனவு பற்றி கூறுவதாவது;
~கனவுக்குள் இருக்கும் விஷயத்தை உணர்ந்துகொள். கயிற்றால் கட்டப்பட்ட பறவை நாலா திசைகளிலும் பறந்தாலும் விலகிச்செல்ல இயலாமல் கட்டப்பட்ட இடத்திற்கே வந்து சேர்வதைப்போல் மனமும் பல திசைகளில் பாய்ந்து திரிந்தாலும் வேறு போக்கிடம் இல்லாததால் உயிரிடமே வந்து சேருகிறது~ என்று உத்தாலக் ஆருணி தனது மகனான ஸ்வேதகேதுவுக்கு கூறுவதாக கூறுகிறது.
இசுலாமிய கருத்துக்கும், மிகப் பழமையான இந்து மத வேதங்களின் கருத்திற்கும் என்ன வேறுபாடு உள்ளது? 1400 ஆண்டுகளுக்கு முன்பே எப்படிக் கூறமுடியும் என்று வியக்கும் அலிசன் 3000 ஆண்டுகளுக்கு முன்பே இந்து மதம் கூறியுள்ளதை ஏன் பார்க்கவில்லை?
அடுத்து ஒரு விஞ்ஞானியான பிஜே அவர்கள் இதுபற்றி என்ன கூறுகிறார் என்று பார்ப்போம்.
ஒரு மனிதன் தூங்கும்போது அவனது பாதி ஆத்மா பிரிந்து சென்று உலகத்தை எல்லாம் சுற்றி வருகிறதாம். அதாவது இதயம் துடிக்க மற்றும் அனிச்சை செயலுகளுக்கு தேவையான அளவு உயிர் மட்டும் உடலில் தங்கிக்கொண்டு மீதி உயிர் பறந்து பறந்து ஜாலியா உலகத்தை சுற்றி வருகிறதாம். அந்த பாதி ஆத்மா எங்கபோய் எதையெல்லாம் பார்க்கிறதோ அதுதான் கனவாக வருகிறதாம். பிறவிலேயே கண்பார்வையற்ற ஒரு பெண்ணிடம் நடத்தின ஆய்வில் கண்டுபிடித்த உண்மை என்று கூறுகிறார் இவர்.
வேடிக்கையை பார்த்திர்களா? உங்கள் உடம்பில் உள்ள ஆத்மா முழுமையான ஒன்றே ஒன்றுதான் என்றுதானே நம்பியிருந்திர்கள்? பாதி ஆத்மா, கால்வாசி ஆத்மா, காலே வீசம் என்றெல்லாம் துண்டாடப்படும் என்று நீங்கள் கனவில்கூட நினைத்துப் பார்த்திருக்கமாட்டீகள்.
உடல்நிலையில் நோய்வாய்ப்பட்டு மோசமாக ஒருவர் இருக்கும்போது அரை உயிருடன் இருப்பதாக கூறும் வழக்கம் நம்மிடம் பொதுவாக உள்ளதுதான். ஆனால் பாதி உயிர் போய்விட்டு மீதி உயிர்தான் இருப்பதாக உண்மையில் நாம் நம்புவதில்லை. அதுபோல இந்த உயிருக்கு உருவம் இல்லாததால் அரை உயிரு, கால் உயிரு என்றெல்லாம் எந்த தத்துவ விளக்கமும் இதுவரை தத்துவவியலாளர்கள் கூறியதில்லை. ஆனால் பிஜே அவர்களுக்கு அலிஅசனின் ஆய்வில் ஏதோ நம்பிக்கை இல்லை போலும். அதனால் பாதி உயிரு பறந்து போகிறது என்ற அறிவியலைக் கண்டுபிடித்துள்ளார். ( இது குறித்த அவரது பேச்சுவை காணொளியாக காணஇங்கே சொடுக்குக http://www.youtube.com/watch?v=p2Jtu30tSGw )
அதுசரி.. பாதி உயிரை அல்லா கைப்பற்றிக்கொள்கிறான் என்று குர்ஆன் கூறவில்லையே. கனவுகள் என்பது அல்லாவின் கட்டளைகளும், அறிவிப்புகளும், வழிகாட்டுதல்களும் என்றுதானே முகம்மதுநபி கூறியுள்ளார்கள். அப்படியிருக்க பாதி உயிர் என்றும், அது பறந்து சென்று பார்ப்பதே கனவு என்றும் இசுலாத்தின் கோட்பாடுகளுக்கே முரணாக இவரது கண்டுபிடிப்பு உள்ளதே. ஏன்? எல்லாம் அறிவியல் படுத்தும் பாடுதான். இந்த ஆத்மாவும் பாதி உயிர், கால்வாசி உயிர் என்று பெரும்பாடுபடுகிறது. கனவுபற்றி சாந்தோக்கிய உபநிடதம் கூறும் கருத்துக்கும் இவரின் கருத்துக்கும் எந்த வேறுபாடுமில்லை.
இவர் கூறியபடி பாதி ஆத்மா பறந்து சென்று எதையெல்லாம் பார்க்கிறதோ அதுதான் கனவு என்று நாமும் கொஞ்சம் நம்புவோம். வாலிப பருவத்தில் அல்லது திருமணம் செய்துகொண்டு பல நாட்கள் உடலுறவு தவிர்க்கப்பட்ட ஒருவருக்கு `ஒருமாதிரி` கனவு வருகிறதே. (இந்தக் கனவிற்கு அவர்கூட விதிவிலக்காக இருந்திருக்க முடியாது என்றே கருதுகிறேன்) அப்படியானால் கற்பு பற்றிய இசுலாத்தின் கொள்கைகளை எப்படி புரிந்துகொள்வது? எவருமே கற்புடன் இல்லை என்று பொருள்கொள்ளலாமா? மர்மத்தலங்களை பாதுகாத்துக்கொள்ளும்படியும் புர்கா போட்டு மூடிக்கொள்ளும்படியும் ஒப்பாரி வைக்கிறார்களே. கனவில் போய் பார்த்துவிட்டால் கற்பு கெட்டுப்போகாதா? இதற்கு தெளிவான பதில் உங்களுக்கு தெரிந்துகொள்ள வேண்டும் என்றால் அவரிடம்தான் கேட்டுத் தெரிந்துகொள்ள வேண்டும்.
இசுலாமிய விஞ்ஞானிகளின் ஆத்மாபற்றிய அறிவியலைப் பார்த்தோம். அடுத்ததாக இந்த ஆத்மா பற்றி குர்ஆன் கூறும் முரன்பாடுகளைப் பார்ப்போம்.
இறந்த உடலும் அதன் ஆத்மாவும் – குர்ஆனிலுள்ள முரண்பாடுகள்.
ஒருவர் இறந்தபின் அவருடைய உடல், ஆத்மா பற்றி கொஞ்சம் மீண்டும் நினைவுபடுத்திக்கொள்வோம். ஒவ்வொரு உயிரையும் படைக்கும்போது பரமாத்மா (கடவுள்) தன்னிடம் உள்ள ஆத்மாவிடமிருந்து -உயிரிடமிருந்து- ஒருசொட்டு எடுத்து புதிய உடலுக்கு கொடுத்து உயிராக்கிறது. இந்து, கிறித்துவ, இசுலாமியக் கோட்பாடுகள் அனைத்தும் இவ்வாறே கூறுகிறது.
இறந்தபின் ஒருவருடைய உடல் அழிந்துவிடுகிறது என்றும் அதன் ஆத்மா மறுபிறப்பிற்கெல்லாம் பிறகு பரமாத்மாவிடம் சென்று சங்கம்மாகிறது என்றும் இந்து மதம் கூறுகிறது. உடல் அழிந்து ஆத்மா மட்டும், உலகம் அழியும்வரை நடுவானில் இளைப்பாறிவிட்டு சொர்கம் அல்லது நரகத்திற்கு போகிறது என்று கிறித்துவம் கூறுகிறது.. ஆனால் இசுலாம் இதில் முரண்பட்டக் கருத்தைக்கொண்டுள்ளது. உலகம் அழியும்நாள் வரை நரகமோ சொர்கமோ இல்லாமல் இந்த மனிதனை சும்மாவிட்டால் அச்சநிலையில் இருத்திவைக்க முடியாது என்று முகம்மதுநபி உணர்ந்திருந்த்தால் இந்த முரண்பாடுகள்.
இதற்கு காரணம் அக்காலத்திலேயே இறந்த மனிதன் மீண்டும் உயிர் எழுப்பப்படமாட்டான் என்ற தத்துவ விளக்கங்கள் யூதர்களிடமும், குறைசிகளிடமும் தோன்றத் தொடங்கி இருந்தன. இதன் பொருள் அவர்களிடம் கடவுள் மறுப்பு கோட்பாடு ஆதிக்கம் செலுத்தியது என்பதல்ல. ~முற்பகல் செய்யின் பிற்பகல் விளையும்~ என்ற கருத்தாக்கம் உருவாகிநிருந்ததே இதற்குக் காரணம். அதாவது, பாவத்திற்கு தண்டனை இறந்தபின்தான் கிடைக்கும் என்ற கருத்தாக்கம் அவர்களின் ஆளும் வர்கத்திற்கு போதுமானதாக இல்லை.
முகம்மதுநபிக்கு பிறகு தோன்றி இசுலாமி தத்துவவியலாளர்களில் ரோஸ்த் என்பவருடை தத்துவங்களே ஐரோப்பிய தத்துவங்களை பொருள் முதல்வாதத்தை நோக்கித் தள்ளத்தொடங்கியதாக ராகுல்ஜி குறிப்படுகிறார்.
குர்ஆன், ஹதீது வழியாக முகம்மதுநபியின் முரண்பாடுகளைப் பார்ப்போம். நான் முன்பே கூறியுள்ளதுபோல் செத்துவிட்ட ஒருவர் நாம் பேசுவதைக் கேட்கிறார்; தொடுவதை உணர்கிறார்; பதில் சொல்கிறார் ஆனால் அவரின் சொற்கள் நமக்கு கேட்பதில்லை என்று வரிசையாக நிறைய குர்ஆனும் ஹதீதுகளும் கூறுகின்றன. இறந்தபின் ஒருவரின் மண்ணறை வாழ்வு தொடங்குகிறது என்று ஆத்மாவின் இரண்டாம் கட்ட வாழ்வாக கூறுகிறது. ( உலகம் அழிவுக்குப்பின் நீதிவிசாரனை நடத்தி சொர்கம் நரகம் கொடுப்பது மூன்றாம் கட்ட வாழ்வுபோலும் )
புகாரி314. இறைத்தூதரஅவர்கள் கூறினார்கள்.”
ஜனாஸா (பெட்டியில் வைக்கப்பட்டு) அதை ஆண்கள் தங்களின் தோள்களில் தூக்கிச் செல்லும்போது, அந்த ஜனாஸா நல்லறங்கள் புரிந்ததாக இருக்குமானால், என்னை விரைந்து கொண்டு செல்லுங்கள் என்று கூறும். அது தீய அறங்கள் புரிந்ததாக இருந்தால் கைசேதமே! எங்கே என்னை கொண்டு செல்கிறீர்கள் என்று கூறும். இவ்வாறு கூறும் சப்தத்தை மனிதனைத் தவிர அனைத்தும் செவியுறும். மனிதன் அதை செவியுற்றால் மயங்கி விழுந்துவிடுவான்.
அபூ ஸயீதுல் குத்ரி அறிவித்தார்.
இறந்த ஒருவரை புதைக்கச் செல்லும்போது நன்மை செய்தவராக இருந்தால் தமக்கு மண்ணறையில் ( புதைகுழியில் ) சொர்கம் போன்ற சுகமான இருப்பிடம் கிடைக்கும் என்று சீக்கிரம் தம்மை புதையுங்கள் என்று கூறுவாராம். தீமைகள் செய்தவராக இருந்தால் தமக்கு மண்ணறையில் ( புதைகுழியில் ) நரகம் போன்ற நெருப்புக் காற்றும்., புதைகுழி நெருக்கி துன்பப்படுத்தும் என்பதால் என்னை புதைத்துவிடாதீர்கள் என்று கதறுவார்களாம் என்று இந்த நபி மொழி கூறுகிறது.
புகாரி 1373. அஸ்மா பின்த் அபீ பக்ர்(ரலி) அறிவித்தார்.
ஒரு முறை நபி(ஸல்) அவர்கள் உரையாற்றும்போது, மண்ணறையில் மனிதன் அனுபவிக்கும் சோதனையைப் பற்றிக் கூறினார்கள். அவ்வாறு கூறிக்கொண்டிருக்கும்போது முஸ்லிம்கள் (அச்சத்தால்)கதறிவிட்டார்கள்.
புகாரி 1374. இறைத்தூதர்(ஸல்) அவர்கள் கூறினார்கள்:
ஓர் அடியான் கப்ரில் அடக்கம் செய்யப்பட்டு அவனுடைய தோழர்கள் திரும்பிச் செல்லும்போது, அவன் அவர்களின் செருப்பின் ஓசையைச் செவியேற்பான். அப்போது இரண்டு வானவர்கள் அவனிடம் வந்து அவனை எழுப்பி உட்கார வைத்து, ‘இந்த மனிதரைப் பற்றி என்ன கருதிக் கொண்டிருந்தாய்?’ என்று முஹம்மத்(ஸல்) குறித்துக் கேட்பர். அவன் இறைநம்பிக்கையாளனாக இருந்தால் ‘இவர் அல்லாஹ்வின் அடியாரும் தூதருமாவார் என நான் சாட்சி கூறுகிறேன்’ எனக் கூறுவான். அவனிடம் (நீ கெட்டவனாய் இருந்திருந்தால் உனக்குக் கிடைக்கவிருந்த) நரகத்திலுள்ள உன்னுடைய இருப்பிடத்தைப் பார். (நீ நல்லவனாக இருப்பதால்) அல்லாஹ் இதை மாற்றி உனக்குச் சொர்க்கத்தில் இருப்பிடத்தை ஏற்படுத்தியுள்ளான் எனக் கூறப்படும். இரண்டையும் அவன் ஒரே நேரத்தில் பார்ப்பான்…”அவனுக்கு மண்ணறை விசாலமாக்கப்படும்” என்றும் இறைத்தூதர்(ஸல்) அவர்கள் கூறினார்கள் என இதன் அறிவிப்பாளரான கதாதா குறிப்பிடுகிறார்…
நயவஞ்சகனாகவோ நிராகரிப்பவனாகவோ இருந்தால் ‘இந்த மனிதர் விஷயத்தில் நீ என்ன கருதிக் கொண்டிருந்தாய்?’ என அவனிடம் கேட்கப்படும்போது ‘எனக்கொன்றும் தெரியாது; மக்கள் சொல்லிக் கொண்டிருந்ததையே நானும் சொல்லிக் கொண்டிருந்தேன்’ எனக் கூறுவான். உடனே ‘நீ அறிந்திருக்கவுமில்லை: (குர்ஆனை) ஓதி (விளங்கி)யதுமில்லை” என்று கூறப்படும். மேலும் இரும்பு சுத்திகளால் அவன் கடுமையாக அடிக்கப்படுவான். அப்போது அவனை அடுத்திருக்கும் மனிதர்களையும் ஜின்களையும் தவிர மற்ற அனைத்துமே செவியுறும் அளவுக்கு அவன் அலறுவான்.”
அனஸ் இப்னு மாலிக்(ரலி) அறிவித்தார்.
இறந்த ஒருவரை புதைத்தவுடன் இரு வானவர்கள் (தேவர்கள்) புதை குழிக்குள் சென்று புதைக்கப்பட்டவனிடம் கேள்விகள் கேட்பார்களாம். அவர்கள் கேட்கும் கேள்விக்கு புதைக்கப்பட்டவனால் பொய்யான பதில் கூறமுடியாது. அந்த வானவர்கள் அவனிடம் ஒரு விசாரனை நாடகம் நடத்தி ( எற்கனவே தலைவிதியை தீர்மானிக்கும் பலகையில் எழுதப்பட்டவைகள்தான் ) அவன் செய்த நன்மைகளையும் தீமைகளையும் தனித்தனி குறிப்பேட்டில் எழுதிக்கொள்வார்களாம்.
தீமைகளை அதிகம் செய்தவனுக்கு புதைகுழி சுருங்கி அவனை நெருக்கும். நரகத்திலிருந்து கடும் வெப்பக் காற்று புதைகுழிக்குள் வீசும். நன்மைகளை அதிகம் செய்தவனுக்கு புதைகுழி அகன்று சொர்கத்தைப்போல அமைக்கப்படும். அதில் அவன் நிம்மதியாக உறங்கிக்கொண்டிருப்பான் என்று நபிமொழிகள் கூறுகின்றன.
புகாரி1361 .இப்னு அப்பாஸ்(ரலி) அறிவித்தார்.
வேதனை செய்யப்பட்டுக் கொண்டிருக்கும் இருவருடைய கப்ருகளைத் கடந்து நபி(ஸல்) அவர்கள் சென்றபோது, ‘இவ்விருவரும் வேதனை செய்யப்படுகிறார்கள்; ஆனால் மிகப் பெரும் பாவத்திற்காக வேதனை செய்யப்படவில்லை. ஒருவர் சிறுநீர் கழிக்கும்போது மறைக்காதவர்; இன்னொருவர் கோள் சொல்லித் திரிந்தவர்’ எனக் கூறிவிட்டு, ஈரமான ஒரு பேரீச்ச மட்டையை இரண்டாகப் பிளந்து இரண்டு கப்ருகளிலும் ஒவ்வொன்றை நட்டார்கள். தோழர்கள், ‘இறைத்தூதர் அவர்களே! ஏன் இவ்வாறு செய்கிறீர்கள்?’ என்று கேட்டதும், ‘இவ்விரண்டின் ஈரம் காயாதவரை இவர்களின் வேதனை குறைக்கப்படக்கூடும்’ என்று இறைத்தூதர்(ஸல்) அவர்கள் கூறினார்கள்.
இந்த நபிமொழிகள் இறந்தவிட்ட ஒருவர் பேசுவதைக்கேட்கிறார், பதில் சொல்லுகிறார், வலி போன்ற வேதனைகளை உணர்கிறார் என்று கூறுகின்றனஆனால் குர்ஆனுடைய பின் வரும் வசனங்கள் இதற்கு முற்றிலும் முரணாக இறந்தபிறகு (தூக்கத்திலும்கூட) ஆத்மாவை அல்லா கைப்பற்றிக் கொள்வதாகவும், உலகத்தை அழித்தபிறகே, சிதைந்து சிதறிவிட்ட எலும்புகளை எல்லாம் ஒன்று கூட்டி சதைகளையும் உயிரையும் கொடுத்து எழுப்பப்படும் என்று கூறுகின்றன.
குர்ஆனின் வசனம் 39;42 உயிரைக் (ஆத்மாவை) கைப்பற்றி அல்லா தன்னிடமே வைத்துகொள்கிறான் என்று கூறுகிறது.
வசனம் 2;259 ஒரு கிராமத்தின் பக்கம் சென்ற ஒருவரை (நீர் கவனிக்கவில்லையா? அந்த கிராமமானது அதனுடைய (வீட்டு) முகடுகளின் மீது இடிந்து விழுந்து கிடந்தது. இவ்வாறு இது அழிந்துவிட்டபின் அல்லாஹ் எவ்வாறு உயிர்ப்பிப்பான் என்று அவர் கூறினார். அப்போது அல்லாஹ் அவரை நூறாண்டுகள் வரை மரணமடையச் செய்தான். பிறகு அவரை ( உயிர் கொடுத்து ) எழுப்பி ~எவ்வளவு நேரம் (இந் நிலையில் இங்கு ) தங்கி இருந்தீர்? என்று கேட்டான். (அதற்கு) ~ஒரு நாள், அல்லது ஒரு நாளில் சிறிது நேரம் தங்கி இருந்தேன்~ என்று அவர் கூறினார். ~அவ்வாறில்லை. நீர் நூறு ஆண்டுகள் (இந்நிலையில்) தங்கியிருந்தீர். (இதோ) உம்முடைய உணவையும், பானத்தையும் பார்ப்பீராக. அவை மாறிவிடவில்லை. ஆனால் (மக்கி மடிந்துவிட்ட) உனது கழுதையைப் பாரும். உம்மை மனிதர்களுக்கு அத்தாட்சியாக்குவதற்காக (உம்மை மரணிக்கச் செய்து எழுப்பினோம்.) இன்னும் (அக்கழுதையின்) எலும்புகளைப் பாரும். (உம் கண்முன்) அவற்றை எவ்வாறு நாம் ஒன்று சேர்க்கிறோம்; பின்னர் அவற்றிற்கு (எவ்வாறு) சதையை அணிவிக்கிறோம்~ என்று அவன் கூறினான். எனவே (இவை அனைத்தும்) அவருக்கு தெளிவானபோது ~நிச்சயமாக அல்லாஹ் எல்லாப் பொருட்களின்மீதும் சக்கியுள்ளவன் என்று (உறுதியாக) அறிகிறேன்~ என்று கூறினார்.
செத்து எல்லாம் அழிந்துவிட்டபிறகு எப்படி எங்களை நரகத்தில் போடமுடியும் என்று இசுலாத்தை எற்றுக்கொள்ளாதவர்கள் தர்க்கம் செய்தபோது, ஒருகிராமத்தானை சாகடிக்கச் செய்து, சதையும், தோலும், உடல் உறுப்புகளெல்லாம் அழிந்துவிட்டாலும் நூறாண்டுகளுக்குப்பிறகு அவைகளையும் எலும்புகளையும் ஒன்று திரட்டி மீண்டும் அந்த கிராமத்தானை, அல்லா உயிர் கொடுத்து எழுப்பிய கதையை, அவர்களிடம் எடுத்துக்காட்டாக முகம்மதுநபி கூறிய வசனம் இது. நூறாண்டுகள் புதைகுழியில் இருந்த அந்த கிராமத்தான் மீண்டும் உயிர் கொடுத்து எழுப்பப்படும்போது சில மணிநேரங்களே தாம் ஏதும்அறியாத செத்த நிலையில் இருந்ததாக உணர்வார் என்றும் கூறுகிறது.
இதே கருத்தை குர்ஆன் வசனம் வசனம் 10;45 அவர்களை அவன் ஒன்று சேர்க்கும் நாளில், ஒரு பகலில் சற்று நேரமே தவிர நிச்சயமாக தாம் (உலகில்) தங்கியிருக்கவில்லை போலும் (என்று எண்ணுவார்கள். அப்போது) அவர்களிடையே ஒருவருக்கொருவர் அறிந்து கொள்வார்கள்……
– உலகம் அழியும்போதுதான் உயிர் கொடுக்கப்கடுகிறது என்று கூறுகிறது.
உயிர் இல்லாத உடல் எப்படி பேசுவதைக் கேட்கும்? பதில் சொல்லும்? வேதனைகளை உணரும்? உலகம் அழியும்வரை உயிரற்று சிதைந்துபோன உடலுக்கு மண்ணறை வாழ்வு என்ற கோட்பாடு குர்ஆனுக்கே முரண்பாடாக உள்ளதே.
ஆனால் குர்ஆன் தன்னுடைய முரண்பாட்டிற்கே முரண்பாடாக வசன எண்; 40;46 -ல்
நெருப்பு – காலையிலும் மாலையிலும் அதன்மீது அவர்கள் எடுத்துக் காட்டப்படுவார்கள். மறுமைநாள் நிலைபெறும்போது பிர்அவுனுடைய கூட்டத்தாரை அதில் புகுத்துங்கள் என்று கூறப்படும்.
- என்று புதைக்கப்பட்ட பிர்அவுனின் கூட்டத்தார்களுக்கு தினமும் நகரத்தின் நெருப்பு புதைகுழிக்குள் காட்டப்படுவதாகவும் உலகம் அழிந்த பிறகு அவர்கள் அந்த நரகத்திற்கு அனுப்பப்படுவதாகவும் கூறுகிறது.
உலகம் அழிந்த பின்னர் உயிர்கொடுத்து எழுப்பப்படுமா? அல்லது புதைக்கப்படும்போதே உயிர் கொடுக்கப்பட்டுவிடுமா?
கருத்துகள் இல்லை:
கருத்துரையிடுக